Marekani yakataa kuirejeshea Cuba Ghuba ya Guantamano

Takwa la hivi karibuni la serikali ya Cuba la kutaka kurejeshewa Ghuba ya Guantanamo, limekabiliwa na radiamali hasi kutoka kwa Marekani. Katika uwanja huo, ikulu ya Marekani (White House) imetangaza kuwa juhudi zilizofanywa kwa ajili ya kuboresha uhusiano kati ya Marekani na Cuba hazitafika kiwango cha kuifanya Washington iirejeshee Havana Ghuba ya Guantanamo huko kusini mashariki mwa Cuba. Msemaji wa White House, Josh Ernest, amesema japokuwa Rais Barack Obama anaamini kuwa, jela ya Guantamano inapaswa kufungwa, lakini hana nia ya kufunga kituo cha jeshi la majini la Marekani kilichopo katika eneo hilo.

Eneo la Ghuba ya Guantanamo linalodhibitiwa na Marekani lina kituo cha jeshi la majini la Marekani pamoja na jela ya kijeshi ya nchi hiyo, na miezi minne tu baada ya mashambulizi ya Septemba 11 mwaka 2011, Washington iliwapeleka washukiwa wa ugaidi katika jela hilo. Ghuba ya Guantanamo inakaliwa kwa mabavu na Marekani tangu nchi hiyo na Cuba ziliposaini mkataba mwaka 1903. Hata hivyo Rais Raul Castro wa Cuba Jumatano iliyopita alitangaza kuwa, kurejesha udhibiti wa eneo hilo lenye ukubwa wa kilomita mraba 116 kwa serikali ya Havana ni sharti la kuhuisha uhusiano kati ya nchi hizo mbili.

Inavyoonekana ni kuwa, mchakato wa kuhuisha uhusiano wa Marekani na Cuba unakabiliwa na vizuizi vingi kinyume na ilivyotarajiwa hapo awali. Baadhi ya vizuizi hivyo vinasababishwa na Marekani na vingine ni kutoka upande wa Cuba. Pamoja na hayo ni wazi kwamba kiwango cha vizuizi vya Marekani katika mchakato huo ni kikubwa mno kulinganisha na Cuba. Pamoja na hayo yote, takwa la Cuba la kurejeshewa ardhi ya nchi hiyo ambayo inashikiliwa na Marekani kwa zaidi ya miaka 112 sasa, ni takwa halali na lililotolewa kwa misingi ya haki ya kujitawala serikali ya Cuba.

Wakati huo huo hatua ya Marekani ya kukataa takwa hilo ni hatua isiyo ya kirafiki na ishara kwamba, Washington ingali inataka kuweko kijeshi katika bahari ya Caribbean. Aidha kuendelea shughuli za jela ya Guantamano ni tatizo kwa Marekani yenyewe. Kwa sasa hakuna mpango wa kuifunga jela hiyo, na kama alivyotamka hivi karibuni waziri wa zamani wa ulinzi wa Marekani Chuck Hagel kwamba,  hakuna matumaini ya kufungwa jela ya Guantanamo kabla ya kumalizika kipindi cha uongozi wa Barack Obama. Rais Obama wa Marekani katikati ya mwezi Disemba mwaka jana alichukua hatua kadhaa kwa ajlili ya kufufua uhusiano wa kidiplomasia na kupunguza vikwazo vya kibiashara ilivyokuwa imewekewa Cuba na kwa msingi huo akahitimisha miaka zaidi ya 54 ya uhusiano wa kiadui kati ya nchi mbili hizo. Marekani imekuwa na miamala ya kiadui dhidi ya Cuba tangu baada ya ushindi wa mapinduzi ya nchi hiyo chini ya uongozi wa Fidel Castro, na Washington ilizidisha vikwazo vya kiuchumi dhidi ya nchi hiyo baada ya kushindwa kuipindua serikali ya kimapinduzi ya Cuba katika tukio la Ghuba ya Nguruwe. Mwaka 1962 Cuba pia iliondolewa katika Jumuiya ya Nchi za Amerika kutokana na mashinikizo ya Marekani na kuanzia mwaka 1960 Washington ilianza kuiwekea Havana vikwazo vikubwa katika nyanja za biashara, uchumi na fedha.

Japokuwa baadhi ya wachambuzi wa mambo walidhani kuwa, mchakazo wa kuboresha uhusiano wa Marekani na Cuba ungeshika kasi zaidi baada ya Rais Barack Obama wa Marekani kutoa tangazo la kurejeshwa uhusiano wa kawaida na Havana na suala hilo kupasishwa katika Bunge la Cuba, lakini inaonekana kuwa kuna vizuizi vikubwa katika uwanja huo. Moja ya vizuizi hivyo ni kuendelea uingiliaji wa Marekani katika masuala ya ndani ya Cuba. Ndani ya Kongresi ya Marekani pia kuna upinzani mkali dhidi ya kuhuishwa uhusiano kati ya nchi mbili hizo.