Mwanafunzi wa darasa la tatu ajinyonga

  MWANAFUNZI wa darasa la tatu shule ya msingi Mnomo Kata ya Msangamkuu, Wilaya ya Mtwara Vijijini, Ahmadi Mtuna (10), amekufa baada ya kujinyonga kwa kamba ya manila katika dari la nyumba aliyokuwa akiishi.

Tukio hilo ni la jana saa 5 asubuhi, ambapo wakati Ahmadi anajinyonga, familia yake ilikuwa nyumba ya jirani kwenye shughuli ya Maulid.

Mama mkubwa wa Ahmadi, Sikujua Saidi, alisema jana asubuhi walikwenda na Ahmadi kuchuma korosho maeneo ya barabarani.

Baada ya kumaliza, alimuaga kuwa anarudi nyumbani na alimruhusu. Baada ya kurudi nyumbani, alikuta mlango uko wazi na alipoingia ndani, alimuona Ahmadi ananing’inia.

Alimuita lakini hakuitikia na ndipo akatoka nje kwenda kuwaita majirani kwenye Maulid ili waje wamwangalie na walipofika walibaini ameshapoteza maisha.

Kamanda wa Polisi Mkoa wa Mtwara, Augustine Olomi, alipotafutwa kwa njia ya simu kuthibitisha, alikiri kutokea kwa tukio hilo.

Alisema maofisa wake, wameshakwenda eneo la tukio na atatoa taarifa kwa vyombo vya habari baadaye.