Hamas: Tumeshaangamiza wanajeshi 32 wa Israel

Brigedi za Izzuddin al Qassam, tawi la kijeshi la harakati ya Hamas limesema kuwa, wanamapambano wa Kipalestina wameshawaangamiza wanajeshi 32 wa utawala wa Kizayuni wa Israel tangu jana Jumamosi. Duru za kijeshi za Hamas zimesema kuwa, wanajeshi wa Israel waliojeruhiwa katika mapigano na wanamapambano wa Palestina wamepelekwa hospitalini, huku kamanda wa kikosi maalumu cha makomandoo wa Israel cha Golan akiwa miongoni mwa waliojeruhiwa. Utawala wa Kizayuni wa Israel umekuwa ukitoa taarifa za kutatanisha kuhusu idadi ya wanajeshi wake waliouawa, mara inakiri ni wanajeshi wawili, mara ni wanajeshi saba, na pia kuna taarifa kuwa Israel imekiri kuuawa wanajeshi wake wanane. Wanamapambano wa Palestina aidha wameshambulia kwa makombora vifaru sita vya utawala wa Kizayuni wa Israel. Vile vile karibu makombora 2000 ya wanapambano wa Palestina yameshavurumishwa kwenye miji ya Wazayuni kama vile Tel Aviv, Demona, Eshkol na Be'er Sheva tangu Israel ilipoanza kuishambulia Ghaza siku 13 zilizopita. Aidha mtandao wa al Aqsa umeripoti kuwa utawala wa Kizayuni umepata hasara kubwa pia katika mapigano yanayoendelea tangu leo asubuhi. Wakati huo huo maandamano ya kupinga jinai za Israel yameshadidi katika kona mbalimbali za dunia zikiwemo za nchi za Ulaya Magharibi pamoja na Marekani.