Mauaji ya umati Ghaza usiku huu, watu 87 wauawa kwa pamoja

Vyombo vya habari vimeripoti kuwa, idadi ya Wapalestina waliouawa shahidi katika mashambulizi ya kikatili yaliyofanywa na jeshi vamizi la Israel katika eneo la Shujaiyya huko Ghaza imepindukia watu 87 na zaidi ya 200 wengine kujeruhiwa. Shambulio la ndege za Israel dhidi ya raia ambao wengi wao ni wanawake na watoto wadogo limefanyika katika eneo hilo la Wapalestina baada ya wanajeshi wa utawala wa Kizayuni kushindwa katika medani ya vita. Televisheni mbalimbali za kieneo na kimataifa zimeonesha idadi kubwa ya miili ya watu ikiwa imeenea kwenye mitaa ya eneo hilo huku maafisa wa magari ya wagonjwa wakikiri kuwa wamezidiwa na idadi ya watu wanaosubiri huduma zao. Akiripoti kutoka katika eneo la Shujaiya, mwandishi wa televisheni ya Press TV amesema kuwa, hakuna hata mwanajeshi mmoja wa Kipalestina aliyekuwemo katika watu waliouliwa kinyama na Wazayuni huko Shujaiya. Wanamapambano wa Palestina kupitia vyombo vyao vya habari kama vile televisheni ya al Aqsa wamesema kuwa watalipiza kisasi cha jinai hizo mpya kabisa za utawala wa Kizayuni wa Israel. Tayari wanamapambano wa Palestina wameushambulia kwa makombora mji wa Beyt Yam wa karibu na mji mkuu wa utawala wa Kizayuni, Tel Aviv pamoja na mji wa Be'er Sab'i kwa makombora aina ya M75 na Sijjil 55 ikiwa ni kutekeleza ahadi zao kwa wananchi wa Palestina kuwa hawatoacha jinai za Wazayuni zipite vivi hivi.