Mtuhumiwa wa ulipuaji wa Hoteli ya Makkah Al-Mukarama ahukumiwa kifo

Mahakama ya kijeshi nchini Somalia ilimuhukumu mwanachama wa al-Shabaab, Awiye Ahmed Jama, adhabu ya kifo siku ya Jumatatu (tarehe 7 Julai) baada ya kugundua kwamba alihusika kwenye kuishambulia kwa mabomu Hoteli ya Makkah Al-Mukarama mwezi Novemba, liliripoti gazeti la Al-Shahid la Somalia.

"Awiye Ahmed Jama aliiambia mahakama kwamba yeye ni mwanachama wa al-Shabaab. Pia alikubali kwamba alihusika na mlipuko kwenye hoteli ya Makkah al-Mukarama," alisema mwenyekiti wa mahakama ya kijeshi ya Somalia, Kanali Liban Ali Yaow. "Ni mhalifu hivyo mahakama imemuhukumu adhabu ya kifo."

Jama, mwenye umri wa miaka 25, alikuwa amepokea mafunzo kwa miezi tisa kwenye mji wa Bulo Marer unaoshikiwa na al-Shabaab kabla ya kujaribu mashambulizi hayo, ilisema mahakama hiyo kwa mujibu wa gazeti la Mareeg la Somalia.

Jama alikamatwa tarehe 8 Novemba 2013, baada ya kujaribu kujilipua ndani ya hoteli hiyo kwa kutumia kompyuta ndogo ya kupakata iliyotegwa bomu. Dakika kadhaa kabla ya kukamatwa kwake, al-Shabaab ilifanya mashambulizi ya bomu lililotegwa kwenye gari nje ya hoteli hiyo, ikawaua watu wanne na kuwajeruhi 15.

Miongoni mwa waliokufa alikuwa ni mmoja wa wanadiplomasia wa ngazi za juu wa Somalia, kaimu balozi wa zamani mjini London, Abdulkadir Aden Ali "Dhuub".