Mwanamume akiri kuua watoto watano Nyeri

Waombolezaji katika ibada ya mazishi ya Martha Ngunjiri, 6, kijiji cha Tambaya, Kaunti ya Nyeri

POLISI katika Kaunti ya Nyeri wanamzuilia mwanamume aliyekiri kuua watoto watano wachanga katika kijiji cha Tambaya, eneo la Mukurwe-ini.

Mshukiwa alikamatwa Jumanne mchana alipojiunga na wanakijiji waliokuwa wakiandaa mazishi ya mtoto aliyeuawa, na akadai yeye ndiye aliyemuua mtoto huyo wa kike, Martha Ngunjiri aliyekuwa na umri wa miaka sita. 

Mshukiwa huyo pia aliwaambia wakazi hao waliokuwa wamepigwa na mshangao kuwa alikuwa amewaua watoto wengine wanne awali katika kijiji jirani cha Gatura na alikuwa na mipango ya kuua wengine sita.

Wanakijiji hao walisema mshukiwa huyo aliwaeleza kwamba alikuwa anafuata agizo la majini waliomwambia lazima aue watoto kadhaa.

Wanakijiji hao waliwaita maafisa wa polisi kutoka kituo cha Mukurwe-ini ambao waliwasili na kumwokoa mshukiwa kutoka mikononi mwa wakazi wa Tambaya waliokuwa wakitaka kumuua.

Babake msichana aliyeuawa, Bw Charles Ngunjiri alisema kuwa Alhamisi iliyopita alipigiwa simu na jirani yake aliyemwambia kuwa mtoto wake wa pili alitumbukia kwenye tangi la maji la lita 2,800 na akafariki.

Alisema walichukulia binti yao alianguka kwenye tangi kwa ajali na hivyo basi wakaanza mipango ya mazishi hadi Jumanne wakati mwanamume huyo alipojitokeza.

Alisema baada ya mwanamume huyo kukiri mauaji na kukamatwa, waliamua kufanyia mwili wa binti yao ukaguzi wa maiti ili kubaini kiini cha kifo chake.

Ripoti iliyotolewa na madktari ilionyesha kuwa msichana huyo alifariki kwa kunyongwa na wala sio kufa maji ilivyodhaniwa awali. “Alinyongwa kisha akatupwa kwenye tangi la maji,” akasema Bw Ngunjiri.

Akisumulia kuhusu jinsi mshukiwa huyo alivyoungama, mjomba wa msichana huyo Bw Peter Kibara alisema walimwona akiwa amesimama bomani na baadaye mchana walipokuwa wakichimba kaburi alionekana kuhangaikahangaika.

“Tulianza kuchunguza mienendo yake na alipogundua tunamfuatilia, alianza kukimbia nasi tukamfuata. Tulipomkamata na kuanza kumhoji ndipo alikiri yale aliyotenda na kuanza kutusihi tusimuumize,” akasema Bw Kibara. Alisema hata baada ya kukamatwa na polisi alizidi kusisitiza yeye ndiye muuaji.

Afisa wa polisi katika kituo cha Mukurwe-ini ambaye aliomba asitajwe alithibitisha kuwa mshukiwa huyo yuko kizuizini na atapelekwa mahakamani Alhamisi.

“Mshukiwa amekiri kuwa alimuua msichana huyo, na pia ametuambia mambo mengine mengi na tunajaribu kuyachanganua,” akasema afisa huyo.