Duru za habari zinaeleza kuwa, majeruhi wa Ukanda wa Ghaza ambao
wanakwenda nchini Misri kwa lengo la kutibiwa nchini humo hasa baada ya
hospitali za Ghaza kufurika au kukosa madawa, wanafanyiwa muamala mbaya
na maafisa wa afya wa serikali ya Cairo kabla ya kupatiwa huduma. Kwa
mujibu wa duru za habari, majeruhi hao huwa wanaanza kusailiwa maswali
ya kijasusi ambayo hayahusiani na hali zao. Kwa mujibu wa baadhi ya
majeruhi hao wa Kipalestina, maafisa wa serikali ya Misri, huwauliza
maswali mbalimbali ikiwa ni pamoja na kutaka kujua taarifa muhimu kuhusu
nguvu za muqawama, idadi ya njia za chini zinazotumiwa na wakazi wa
Ukanda wa Ghaza kwa ajili ya kujiingizia mahitaji muhimu na namna
wanamapambano wanavyounda silaha. Inaelezwa kuwa, kutokana na muamala
huo mbaya, baadhi ya majeruhi wameamua kurejea Ghaza licha ya hali mbaya
ya kiusalama na kiafya ya ukanda huo kutokana na mashambulizi makali ya
Wazayuni. Tangu ilipoanza hujuma ya jeshi la Israel dhidi ya wakazi wa
Ghaza, serikali ya mpya ya Misri inayoongozwa na Rais Abdel Fattah
el-Sisi, imekuwa ikichukua hatua hasi ikiwemo ya kufunga kivuko cha
Rafah suala linalohesabika kuwa ni kuuzingira zaidi ukanda huo, na
kadhalika kuharibu njia kadhaa za chini kwa chini ambazo zimekuwa
zikitumika kupitishia mahitaji muhimu kwa ajili ya wakazi wa eneo hilo.
Hii ni katika hali ambayo utawala haramu wa Kizayuni, umeendeleza
mashambulizi yake kwa siku ya 23 mtawalia dhidi ya eneo la Ghaza na kuua
shahidi karibu watu 1,200. Aidha kwa upande mwingine muqawama wa
Palestina nao umetangaza kuwa umefanikiwa kuwaangamiza askari wapatao 20
wa Kizayuni ndani ya masaa 24 yaliyopita. Kwa mujibu wa Brigedi ya
Izzudin al Qassam, tawi la kijeshi la harakati ya muqawama ya Palestina
Hamas, askari hao wameuawa wakiwa kwenye magari ya kijeshi ya utawala
huo haramu katika eneo la Shujaiya mashariki. Utawala haramu wa
Kizayuni umekiri kuuawa askari wake watano huku duru nyingine za
Kizayuni zikitangaza askari sita na kujeruhiwa wengine zaidi ya 10.
0 comments:
Post a Comment