Mume, mke wakutwa na mabomu, risasi

JESHI la Polisi nchini limetangaza kuwa Jiji la Arusha si salama tena baada ya kukamata watu wanane wakihusihwa na matukio mbalimbali ya  milipuko, wakiwemo mtu na mke wake waliokutwa nyumbani kwao wakiwa na mabomu saba na risasi sita za bunduki aina ya Short gun ambazo pia hutumika kulipua mabomu.

Kwamba juhudi za kupata taarifa za bomu lililotumika kulipua mkutano wa Chama Cha Demokrasia na Maendeleo (CHADEMA), kwenye viwanja vya Soweto, ziligonga mwamba kutokana na kampuni iliyotengeneza bomu hilo kuwa imekufa.

Pia jeshi hilo linamtafuta mwalimu wa mchezo wa kareti, Yahya Hela (30) mkazi wa Mianzini anayedaiwa kuhusika katika matukio hayo ya milipuko ya mabomu ambapo limeahidi kutoa zawadi kwa atakayefanikisha kumpata.

Akizungumza na waandishi wa habari jijini hapa jana, Mkurugenzi wa Makosa ya Jinai nchini, Kamishna Isaya Mngulu alisema kuwa watuhumiwa hao ambao watafikishwa mahakamani hivi karibuni ni miongoni mwa watuhumiwa 25, wanaohojiwa na jeshi hilo kuhusiana na matukio ya milipuko.

Aliwataja watuhumiwa sita wanaohusishwa na tukio la mlipuko katika mgahawa wa Vama Traditional uliotokea julai 7, mwaka huu na kujeruhiwa watu saba kuwa ni Imam wa Msikiti wa Cuba, Jafar Lema (38), ambaye alienguliwa hivi karibuni baada ya ujio wa Mufti Shaaban Simba.

Wengine ni mlinzi wa mgahawa wa Vama, Shaaban Musa (26) na walinzi wawili wa mgahawa wa jirani wa Chinise, Athuman Mmasi (38) na Mohamed Noor (30).

Watuhumiwa wengine ni wakala wa mabasi kituo kikuu cha mabasi, Abdi Salum (31) na mfanyabiashara, Said Temba (40).

Mngulua aliwataja wanafamilia waliokutwa na mabomu ya kutupwa, risasi, unga wa baruti, panga na bisibisi kuwa ni Yusuph Ally na mke wake, Sumaia Juma (19) ambao walikamatwa juzi nyumbani kwao maeneo ya Sombetini.

Alisema kuwa uchunguzi wa awali wa jeshi hilo umebaini kuwa mabomu sita yametengenezwa Urusi huku moja likiwa limetengenezwa nchini Ujerumani.

Tukio hili la kukamatwa kwa watuhumiwa hawa limtokea siku tatu baada ya shura ya maimam ya mkoa, kupitia tamko lao lililosomwa na Shekh Juma Ikusi ambaye ni Imam wa Msikiti wa Omary Kimandolu wakidai kuwa kamatakamata hiyo inaendeshwa kwa misukumo ya pande zinazosigana kwenye migogoro ya misikiti.