Iran: Tutaipigania Palestina hata kama dunis nzima itajitenga nao

Kamanda wa Jeshi la Walinzi wa Mapinduzi ya Kiislamu nchini Iran, Muhammad Ali Jaafari, amesema kuwa, hatimaye utawala wa Kizayuni wa Israel utasambaratika na kwamba, Jamhuri ya Kiislamu ya Iran itaendelea kuunga mkono mapambano ya Wapalestina kwa hali na mali. Amesema kuwa, utawala huo utasambaratika chini ya kivuli cha umoja wa Waislamu wa Suni na Shia na kuongeza kuwa, Iran ipo tayari kuhakikisha siku hiyo inawadia kwa kuunga mkono mapambano ya Palestina. Meja Jenerali Ali Jaafari amesema kuwa, Iran haizingatii Usuni au Ushia katika kuutetea Uislamu, bali inachokiangalia ni maslahi ya Umma wa Kiislamu. Akiashiria kuwa hii leo wanamapambano wa Palestina, wameuthibitishia ulimwengu kwamba hawawezi kusambaratika na kinyume chake wanazidi kusonga mbele dhidi ya adui Mzayuni, amesema kuwa Iran haitasita hata kidogo kuwasaidia Wapalestina hata kama ulimwengu wote utajitenga na kadhia ya Wapalestina. Kamanda wa Jeshi la Walinzi wa Mapinduzi ya Kiislamu amesema kuwa, uungaji mkono wa Iran hauishii tu Palestina bali ni kwa kila mtu mwenye kudhulumiwa duniani. Amesema kuwa, hii leo kile kinachojiri katika Ukanda wa Gaza, Syria na Iraq, ni njama za muda mrefu zilizopangwa na utawala haramu wa Israel kwa kushirikiana na Marekani , kwa lengo la kuzigawa nchi za Kiislamu ili kwa njia hiyo iwe rahisi kuvunja nguvu za Waislamu kote duniani.