Pinda akiri kuwapo taarifa za wageni kupata ardhi kwa ujanja

 

 

 Dar es Salaam. Serikali imesema inazo taarifa za kuwapo wageni wanaotafuta ardhi nchini, kwa kutumia mbinu ya kuoa au kuolewa na Watanzania.

Hayo yalibainishwa juzi na Waziri Mkuu, Mizengo Pinda, wakati akitoa salamu kwenye tamasha la Pasaka, lililofanyika Uwanja wa Taifa, Dar es Salaam.

“Siku hizi kuna mbinu inayotumiwa na wageni kwamba ukitaka kupata ardhi nchini kwa urahisi, basi uoe Mtanzania au uoelewe na Mtanzania. Hili hatutalikubali kamwe,” alisema Pinda.

Pinda alikuwa akijibu tahadhari iliyotolewa na waandaaji wa tamasha hilo, Msama Promotions, kuhusu ugawaji ardhi kwa watu wasio Watanzania, kutokana na mkataba wa Jumuiya ya Afrika Mashariki (EAC).

Akitoa tahadhari hiyo, Onesmo Ndegi alitahadharisha Serikali kuwa makini na suala la ardhi katika jumuiya, kwa sababu kuna raia wa nje wamekuwa wakijipenyeza na kupata ardhi nchini.

“Tunaomba ardhi itazamwe kwa jicho la ziada. Watu wanajipenyeza kinyemela wakiinyemelea ardhi yetu, tunaomba mtulindie ardhi,” alisema Ndegi.

Pia, Ndegi alishauri Serikali ipambane na kile alichokiita kikundi cha watu wachache, wanaotaka kuvuruga amani chini ya mwamvuli wa kidini kinachojipanga kwa kazi maalumu.

“Serikali imaanishe kupambana na watu hawa, nasi tuone matokeo na tutaiponegeza. Viongozi wa dini tunawaombea,” alisema Ndegi.

Hata hivyo, Pinda alisema Serikali ina macho ya ziada kwa suala la ardhi na kwamba, hakuna mgeni anayeweza kupewa ardhi kwa njia za ujanjaujanja isipokuwa kwa mujibu wa sheria zilizowekwa.     

MWANANCHI