Misri kuomboleza siku 3, baada ya wanajeshi kuuawa

Rais Abdul-Fattah al-Sisi wa Misri ametangaza siku tatu za maombolezo ya kitaifa kufuatia kuuawa wanajeshi 31 kwenye mpaka wa nchi hiyo na ardhi za Wapalestina zinazokaliwa kwa mabavu na utawala haramu wa Israel.  Maafisa wa serikali ya Misri wanasema matakfiri waliokuwa na silaha waliwafyatulia risasi wanajeshi hao katika mkoa wa Wadi el-Gedid ambapo mbali na 31 kuuawa, wengine 5 pia walijeruhiwa. Rais al-Sisi ameagiza bendera ya taifa ipeperushwe nusu mlingoti kuanzia leo Jumapili hadi Jumanne jioni. Akitoa agizo hilo, kiongozi huyo ameahidi kutumia uwezo wake wote kuwafuatilia na kuwakamata wale waliotekeleza mauaji hayo.

Misri imekuwa ikishuhudia machafuko na ghasia tokea Julai mwaka jana wakati rais wa kwanza kuchaguliwa kidemokrasia Misri, Mohammad Morsi alipoondolewa madarakani katika mapinduzi ya kijeshi yaliyoongozwa na rais wa sasa Abdel Fattah el Sisi ambaye wakati huo alikuwa mkuu wa jeshi.