Wanajeshi 15 wa Israel wauawa Palestina

Wanamapambano wa Palestina wamewaangamiza wanajeshi 15 wa utawala wa Kizayuni wa Israel katika mapigano yaliyojiri Jumamosi katika Ukanda wa Ghaza. Televisheni ya Al Aqsa imeripoti kuwa katika mapigano hayo vifaru viwili vya kisasa kabisa vya jeshi la Israel vinavyojulikana kama Merkava vimeharibiwa kabisa kwa makombora ya wapiganaji wa Harakati ya Mapambao ya Kiislamu ya Palestina Hamas ambao pia wamefanikiwa kuchukua ngawira idadi kubwa ya silaha za wanajeshi hao wa Kizayuni. Taarifa iliyotolewa na Brigedi ya Ezzedine al Qassam, tawi la kijeshi la Hamas imesema wapiganaji wake pia wameharibu magari matatu ya deraya ya jeshi la Kizayuni. Imedokezwa kuwa makomando wa Hamas walikuwa wamevalia sare za jeshi la Wazayuni wakati walipotekeleza oparesheni hiyo.

Wakati huo huo utawala wa Kizayuni umeendeleza hujuma zake za kinyama dhidi ya Wapalestina wasio na hatia katika Ukanda wa Ghaza ambapo jana usiku Wapalestina wanne waliuawa shahidi.  Hadi sasa Wapalestina zaidi ya 350 wameuawa shahidi na wengine 2,300 kujeruhiwa tokea uanze uvamizi wa angani na baadaye nchi kavu dhidi ya Ghaza Julai 8. Umoja wa Mataifa umetangaza kuwa asilimia 80 ya waliopoteza maisha katika hujuma za Israel huko Ghaza ni raia wa kawaida wakiwemo wanawake na watoto wachanga.