Kaburi la umati la Watu lapatikana nchini Thailand

Polisi ya Thailand imetangaza kugunduliwa kaburi la umati ambalo linasaidikiwa kuzikwa ndani yake Waislamu wa Myanmar waliokimbilia nchini humo kwa ajili ya kuokoa maisha yao. Kwa mujibu wa maafisa usalama, kaburi hilo limefichuliwa katika mji wa Songkhla, kusini mwa nchi hiyo na ndani yake walizikwa wahajiri kutoka Myanmar na Bangladesh wengi wao wakiwa ni Waislamu. Polisi ya Thailand imewalaumu wafanyabiashara ya magendo ya watu kuwa ndio wahusika wa jinai hiyo. Aidha imefichua kuwa, kaburi hilo limepatikana karibu na mpaka na nchi jirani ya Malaysia na lipo ndani ya kambi ya kuhifadhia wahajiri ambayo pia ilikuwa ikitumiwa kama jela katika siku za nyuma. Thailand ni moja ya nchi zinazokandamiza sana Waislamu ikiwemo kuwapiga marufuku wanawake wa Kiislamu kuvaa vazi la staha la hijabu mashuleni. Hata hivyo ukandamizaji na unyanyasaji wa Wathailand ambao wengi wao ni Mabudha, haukomei kwa Waislamu pekee wa nchi hiyo, bali hata Waislamu wa nchi nyingine hususan kutoka Myanmar na Bangladesh hawakusalimika na unyanyasaji huo wa viongozi wa Thailand.