Raia wa Vietnam anaswa na meno ya tembo ya mil. 189/-

JESHI la Polisi linamshikilia raia wa Vietnam, Dong Van (47), kwa kumkuta na meno 65 ya tembo na kucha 447 za simba kinyume na sheria vikiwa na thamani ya sh. 189,420,000.

Akizungumza na waandishi wa habari jijini Dar es Salaam jana, Kamanda wa Polisi Uwanja wa Ndege wa Kimataifa wa Julius Nyerere (JNIA), Kamishna Msaidizi (ACP), Hamisi Selemani, alisema mtuhumiwa huyo alikamatwa juzi wakati alipotaka kusafirisha nyara hizo kwa kutumia ndege ya Shirika la Qatar kwenda nchini Vietnam kupitia Doha.

Alisema alipopekuliwa alikutwa na nyara hizo ambazo alizihifadhi kwenye pakiti mbalimbali za vyakula pamoja na kahawa.

“Mtuhumiwa alificha nyara hizo kwenye pakiti saba za kahawa na pakiti moja ya mchele aina ya Pure Basmati na kuzichanganya na pakiti nyingine 15 za vyakula vya aina mbalimbali,” alisema.

Alisema pakiti hizo ziliwekwa ndani ya begi la nguo ili kupoteza ushahidi wa aina ya mzigo aliobeba kwa wakaguzi wa uwanjani hapo.

Kamanda Selemani, alisema utoroshaji wa nyara hizo umekuwa tatizo kubwa nchini, kutokana na baadhi ya wananchi ambao hawana mapenzi mema kuanza kujiingiza kwenye shughuli hizo na kuisababishia serikali hasara.

 Alisema kutokana na hali hiyo, mtuhumiwa huyo atafikishwa mahakamani mara baada ya kukamilika kwa uchunguzi ili aweze kuchukuliwa hatua za kisheria.

Kamanda Selemani, aliwaomba wananchi kutoa ushirikiano pindi wanaposikia au kuona baadhi ya watu wanajishughulisha na vitendo vya uporaji wa rasilimali za nchi ili waweze kukamatwa na kufikishwa kwenye vyombo vya kisheria.