Stars kutua Msumbiji leo

 

MSAFARA wa timu ya soka ya Tanzania, Taifa Stars unatarajiwa kuondoka leo jioni Afrika Kusini kwenda Msumbiji tayari kwa mechi ya keshokutwa kuwania tiketi ya kuingia kundi F, kupigania nafasi ya kucheza fainali za Kombe la Mataifa Afrika mwakani nchini Morocco.

Stars iliyotoka sare ya mabao 2-2 katika mechi ya kwanza iliyochezwa wiki mbili zilizopita katika Uwanja wa Taifa, jijini Dar es Salaam, itatupa karata muhimu kuamua hatima yake ya kucheza kampeni hizo.

Mechi hiyo ya Jumapili ndiyo itaamua timu mojawapo ya kuungana na Zambia, Niger na Cape Verde zilizojitwalia tiketi ya moja kwa moja ya hatua ya makundi kutokana na ubora wao kisoka.

Ofisa Habari wa Shirikisho la Soka Tanzania (TFF), Boniface Wambura aliyeongozana na timu hiyo, alisema kikosi kiliwasili salama mjini Johannesburg, Afrika Kusini tangu juzi na kuendelea na maandalizi ya mwisho kabla ya leo kwenda Maputo, Msumbiji.

Stars inayodhaminiwa na Kampuni ya TBL kupitia kinywaji chake cha Kilimanjaro Premium Lager, jana ilifanya mazoezi asubuhi na jioni katika uwanja wa Bedfordview Country Club, nchini Afrika Kusini chini ya Mholanzi Mart Nooij.

Kwa mujibu wa Wambura, mazoezi ya mwisho yatafanyika leo asubuhi kabla ya jioni kuanza safari ya Maputo.

Balozi wa Tanzania nchini Afrika Kusini, Razia Msuya, jana jioni alizitembelea timu zote mbili, ikiwemo ya vijana wa chini ya miaka 17 – Serengeti Boya, zilizopo Johannesburg na kuwasalimu wachezaji na viongozi.

Serengeti Boys iliyopo Afrika Kusini tangu Julai 27, inajindaa na mechi ya marudiano dhidi ya wenzao wa huko itakayochezwa kesho kuwania timeti ya fainali za Afrika.

Mara ya kwanza na mwisho Stars kucheza fainali za Kombe la Afrika, ni mwaka 1980, mjini Lagos, Nigeria, ilipoishia hatua ya makundi baada ya kumaliza ya mwisho ikiwa na pointi moja, ikitanguliwa na Nigeria (5), Misri (4) na Ivory Coast (2) katika kundi la A.