Manjagili walio ua fari hatarini, waskwa usikuu na mchana

WIZARA ya Maliasili na Utalii imetuma kikosi maalumu cha askari 20 kuwasaka majangili walioua faru na kuchukua pembe zake, usiku wa kuamkia jana katika Hifadhi ya Taifa ya Serengeti.

Mbali na kufanya ujangili huo, watu hao wanadaiwa kuingia katika Mamlaka ya Hifadhi ya Ngorongoro wakiwa na SMG tatu, saa 9 alasiri na kuvamia basi la abiria na kisha kupora fedha na mali za wasafiri.

Akizungumza na waandishi wa habari jana, Naibu Waziri wa Maliasili na Utalii, Lazaro Nyalandu, alisema kutokana na matukio hayo wizara kwa kushirikiana na vyombo vya dola imechukua hatua za dharura  kuagiza msako wa majangili ndani ya hifadhi hizo.

Nyalandu alisema kuwa gari lolote linaloingia katika hifadhi hizo, lazima lipekuliwe ikiwa ni jitihada za kuwasaka majangili hao.

Alisema hadi sasa wamepata taarifa za kuonekana kwa raia watatu wa nchi moja mwanachama wa Jumuiya ya Afrika Mashariki ambao wanadaiwa kuunda mtandao wa kumuua faru huyo mkubwa kuliko wote nchini.

“Serikali inawasaka kwa udi na uvumba raia hao watatu, na wananchi wanaombwa kusaidia kutoa taarifa kwa vyombo vya ulinzi ili kufuatilia nyendo zao kwa karibu,” alisema.

Nyalandu alisema hadi sasa hifadhi ya Serengeti ina faru 32 huku wale wa mradi maalumu unaosimamiwa na Rais Jakaya Kikwete wakibaki wanne baada ya mmoja kuuawa mwaka 2012.

“Tupo katika hatua za mwisho kuandaa utaratibu wa kuwa na sheria kali dhidi ya vitendo vya ujangili, ikiwa ni pamoja na kuweka ujangili kama uhujumu uchumi,” alisema.

Alisema serikali bado inarekebisha kasoro zilizojitokeza katika awamu ya kwanza ya Operesheni Tokomeza Ujangili, na kusisitiza kuwa awamu ya pili ya operesheni hiyo itaanza hivi karibuni, lakini hawezi kutaja tarehe kwa hofu ya kuwapa faida  majangili.

Kuhusu vita ya ujangili

Nyalandu alisema vita ya kupambana na ujangili imekuwa kubwa na majangili wamekuwa wakitafuta vikwazo kuhakikisha wanakwamisha jitihada hizo.

“Vita hii sio yangu kama Nyalandu, vita ni ya kila mmoja kwa ajili ya vizazi vyetu. Kama tutakubali kugawanywa tufahamu kuwa rasilimali zetu zitakwisha, najua wapo watu wanatafuta vikwazo kuona Nyalandu naaibika, hata wamekuwa wakipotosha baadhi ya taarifa,” alisema.

Alisema kuwa wapo watu wanaopandikiza maneno ya uongo dhidi ya viongozi wa serikali walio mstari wa mbele kupambana na majangili.

Watatu wadakwa

Katika hatua nyingine, wiki iliyopita majangili watatu ambao ni wakazi wa Dar es Salaam walikamatwa wakisafirisha  kilo 37 za meno ya tembo katika gari ndogo, wakitoka mkoani Iringa.

Nyalandu aliwataja waliokamatwa kuwa ni Salome Aloyce mkazi wa Sinza, Rajabu Omari mkazi wa Kigogo na Kadili Kisanduku  wa Mbezi.

Alisema kuwa watu hao walikuwa katika gari dogo aina ya Toyota Corona mali ya Florian Elias mkazi wa jijini Dar es Salaam. Watuhumiwa hao wanashikiliwa na polisi kwa hatua zaidi za kisheria.